Fjallvegahlaupasumarið 2025 hefst með látum laugardaginn 24. maí nk. kl. 10:00 með hlaupi yfir Hellisheiði, eftir gamla veginum frá Hellisheiðarvirkjun til Hveragerðis. Þar gefst meðal annars tækifæri til að skoða gamla veginn niður Kambana, en umfram allt verður þetta góður dagur í góðum félagsskap og (næstum örugglega) í góðu veðri.

Hlaupið yfir Hellisheiðina verður 82. fjallvegahlaupið frá því að fjallvegahlaupaverkefnið hófst sumarið 2007. Stefnt er að því að fjallvegirnir verði orðnir 100 talsins fyrir árslok 2026, enda er ný fjallvegahlaupabók frá bókaútgáfunni Sölku væntanleg í allar helstu bókabúðir í mars 2027 (á sjötugsafmælinu mínu). Þar verða frásagnir og myndir frá síðustu 50 hlaupum (hlaupum nr. 51-100).

Að sjálfsögðu er öllum boðið að taka þátt í Hellisheiðarhlaupinu. Vegalengdin er ekki nema rétt um 14 km og hraðinn verður bara sá sem flestum hentar. Fólk má t.d. alveg ganga þetta rösklega. Fjallvegahlaupin eru jú skemmtihlaup en ekki keppni. Og staðsetning hlaupsins gerir það að verkum að stór hluti þjóðarinnar ætti að eiga tiltölulega auðvelt með að koma sér á staðinn.

Þátttakan í Hellisheiðarhlaupinu kostar ekki neitt en þátttakendur fara þetta á eigin ábyrgð. Hlaupið er skipulagt í samstarfi við bókaútgáfuna Sölku og þess vegna er fólk beðið að skrá sig á þar til gerðan Facebookviðburð. Hver veit nema efnt verði til uppákomu í lok hlaupsins, þar sem fjöldinn skiptir máli.

Reimum á okkur hlaupaskóna og hittumst við Hellisheiðarvirkjun laugardaginn 24. maí nk. kl. 10:00. Nánar tiltekið hefst hlaupið rétt innan við aðalbyggingar virkjunarinnar, þ.e.a.s. rétt hjá Kolviðarhóli.

Nánari upplýsingar um hlaupaleiðina má nálgast á viðeigandi síðu hérna á vefnum og fyrirspurnir má senda á stefan@umis.is.

Fjallvegahlaupadagskrá sumarsins 2025 er nokkurn veginn tilbúin. Á henni eru hvorki meira né minna en tólf leiðir – og hafa aldrei verið fleiri. Nú eru líka bara tvö sumur eftir af fjallvegahlaupaverkefninu og á þessum tveimur sumrum þarf ég að hlaupa 19 fjallvegi til að ná markmiðinu um100 fjallvegi fyrir sjötugt. Ef ég næ tólf hlaupum í sumar verða ekki nema sjö eftir fyrir sumarið 2026. Hlýtur það ekki að nást?

Dagskrá sumarsins birtist í heild sinni á undirsíðunni Næstu hlaup og verður uppfærð og lagfærð jafnóðum ef einhverjar breytingar verða. Og breytingar verða oft. Ég mun gera mitt besta til að upplýsa um slíkt, þótt seint verði, á Fésbókarsíðu fjallvegahlaupaverkefnisins.

Myndin sem fylgir þessari færslu er ein af uppáhalds fjallvegahlaupamyndunum mínum. Hana tók Björk af mér á Ólafsfirði að morgni 24. júní 2008 þegar ég var í þann veginn að leggja upp í fjallvegahlaup nr. 3 og 4 yfir Rauðskörð og Hólsskarð. Þetta ferðalag var eitt af þeim eftirminnilegustu það sem af er, en ekki endilega það gáfulegasta. Þetta tvennt fer oft saman.

Sumarið 2024 er liðið. Klúkuheiði á Vestfjörðum (fjallvegur nr. 81) er eini fjallvegurinn sem bættist í safnið á árinu og því er ljóst að næstu tvö sumur (2025 og 2026) þarf ég að afgreiða samtals 19 fjallvegi til að ná hundraðinu í tæka tíð fyrir útgáfu nýrrar fjallvegahlaupabókar í mars 2027.

Drög að fjallvegahlaupadagskrá sumarsins 2025 verða birt þegar nær dregur. Hugmyndir um verkefnin sem þá verður fengist við eru nánast ómótaðar, en væntanlega verða alla vega Marðarnúpsfjall, Ketuvegur og Flateyjardalsheiði á þeim lista, já og vonandi um það bil sjö fjallvegir til viðbótar. Allar tillögur eru vel þegnar.

Myndin sem fylgir er ekki úr fjallvegahlaupi. Kristinn Óskar Sigmundsson tók sem sagt þessa mynd af mér sitjandi á toppi Hafnarfjalls seint í ágúst í sumar.

Fjallvegahlaupunum tveimur sem áttu að hefjast í Hrútafirði á morgun, fimmtudaginn 15. ágúst, hefur verið frestað um óákveðinn tíma.

Fimmtudaginn 15. ágúst nk. ætla ég að hlaupa tvo fjallvegi milli Hrútafjarðar og Miðfjarðar, nánar tiltekið:

1. Húksleið – Frá Brandagili í Hrútafirði að Húki í Miðfirði – 9 km
   Þarna er jeppavegur og leiðin líklega ein af þeim auðveldari
   Reikna með að leggja af stað frá Brandagili kl. 10:00
2. Hrútafjarðarháls – Frá Þóroddsstöðum í Hrútafirði að Skarfshóli í Miðfirði – 11 km
   Veit ekki alveg hversu auðfundin þessi leið er, en vegalengdin er alla vega viðráðanleg.
   Reikna með að leggja af stað frá Þóroddsstöðum kl. 13:30

Eins og stundum áður getur þessi áætlun breyst með litlum fyrirvara, en ég læt þá vita um slíkar breytingar á Facebooksíðu Fjallvegahlaupaverkefnisins. Sem fyrr er öllum velkomið að slást í för með mér – á eigin ábyrgð. Öryggisins vegna er gott að láta mig vita fyrirfram (sími 862 0538), en það er samt engin skylda.

Ef allt gengur að óskum verður þetta annað og þriðja fjallvegahlaup sumarsins. Enn sem komið er hefur mér sem sagt bara tekist að ljúka einu hlaupi, þ.e.a.s. yfir Klúkuheiði milli Önundarfjarðar og Dýrafjarðar. Fór þar einn yfir í einkar góðu veðri 16. júlí sl. Myndin sem fylgir þessari færslu var tekin í þeirri ferð.

Sennilega verða fjallvegahlaup sumarsins ekki fleiri en þessi þrjú. Það þýðir að ég þarf að afgreiða samtals 17 fjallvegi tvö síðustu sumur verkefnisins (2025 og 2026). Það ætti ekki að vera mikill vandi ef heilsan er góð.

Nú stefnir allt í að ég nái að hlaupa yfir Klúkuheiði nk. þriðjudag (16. júlí 2024). Ef allt gengur að óskum legg ég af stað frá Tungu í Valþjófsdal í Önundarfirði kl. 9:30 árdegis og verð komin að Gerðhömrum í Dýrafirði um 12-leytið. Vonast til að verða sóttur þangað, en annars skokka ég bara til baka sömu leið. Leiðin öll er um 11,5 km og hæst er farið í tæplega 600 m hæð.

Þorvaldur Thoroddsen á að hafa sagt að Klúkuheiði væri versti fjallvegur sem hann hefði farið á Íslandi, en heiðin sjálf er mjög stutt. Líklega er kaflinn sem gaf Þorvaldi ástæðu til þessarar umsagnar ekki meira en kílómetra langur. Þessi stutti kafli er snarbrattur og laus í sér og því illfær með hesta.

Klúkuheiðin verður 81. fjallvegurinn í fjallvegahlaupaverkefninu mínu. Fjallvegur nr. 82 verður væntanlega Breiðadalsheiði úr Skutulsfirði til Önundarfjarðar – og eins og staðan er í andránni er líklegt að ég hlaupi hana föstudaginn 19. júlí. Laugardagurinn 20. júlí kemur einnig til greina. Meira um það síðar ef af verður.

Sem fyrr er öllum velkomið að slást í för með mér í þessum fjallvegahlaupum – á eigin ábyrgð. Gott væri samt að frétta af ferðafélögum fyrirfram.

Þessi áætlun getur breyst með mjög stuttum fyrirvara. Fylgist því endilega með á Facebooksíðu Fjallvegahlaupaverkefnisins.

Fjallvegahlaupadagskrá sumarsins 2024 hefur ekki enn litið dagsins ljós. Af persónulegum ástæðum á ég erfitt með að skipuleggja hlaup fram í tímann – og því má búast við að hlaup sumarsins verði ákveðin með mjög stuttum fyrirvara og jafnvel hlaupin fyrirvaralaust.

Í andránni eru eftirtaldar leiðir af hugmyndalistanum helst til skoðunar:

1. Klúkuheiði – frá Kirkjubóli í Valþjófsdal í Önundarfirði að Gerðhömrum í Dýrafirði – 13 km
   Þorvaldur Thoroddsen á að hafa sagt að þetta væri versti fjallvegur sem hann hefði farið á Íslandi, en heiðin sjálf er mjög stutt. Mest af þessum kílómetrum flokkast nefnilega sem upphitun og niðurskokk. Og svo er heiðin líklega mun skárri fyrir menn en hesta.
   (Ég geri ráð fyrir að hlaupa Klúkuheiði á tímabilinu 15.-20. júlí nk.).
2. Breiðadalsheiði – Milli Skutulsfjarðar og Önundarfjarðar – 12 km
   Þetta er náttúrulega bara gamli bílvegurinn. Kannski er hann frekar 16 km en 12 km, en það skiptir svo sem ekki öllu máli.
   (Ég geri ráð fyrir að hlaupa Breiðadalsheiði (frá Skutulsfirði) á tímabilinu 15.-20. júlí nk.).
3. Marðarnúpsfjall – Frá Marðarnúpi í Vatnsdal að Marðarnúpsseli í Svínadal – 10 km
   Þarna er jeppavegur yfir og ætti að vera auðvelt að hlaupa fram og til baka sama daginn ef hörgull er á flutningsaðilum.
4. Ketuvegur – Frá Steinnýjarstöðum utan við Skagaströnd að Ketu á Skaga – 20 km
   Þarna er ekki mikil hækkun og líklega gamlir slóðar víðast hvar.
5. Húksleið – Frá Brandagili í Hrútafirði að Húki í Miðfirði – 9 km
   Þarna er jeppavegur og leiðin líklega ein af þeim auðveldari.
6. Hrútafjarðarháls – Frá Þóroddsstöðum í Hrútafirði að Skarfshóli í Miðfirði – 11 km
   Veit ekki alveg hversu auðfundin þessi leið er, en vegalengdin er alla vega viðráðanleg.
7. Gönguskarð ytra – Frá Ytra-Hóli í Fnjóskadal að Hálsi í Kinn – 15 km
   Þetta ætti að vera tiltölulega auðvelt á góðum degi.
8. Flateyjardalsheiði (F899) – Frá Þverá í Dalsmynni að Brettingsstöðum í Flateyjardal – 33 km
   Þessa leið þarf ég endilega að fara, hvort sem það verður í sumar eða síðar. Hún er hins vegar það löng að hlaup fram og til baka er tæplega valkostur. Helst þyrfti jeppa til að flytja hlaupara frá endamarkinu í Flateyjardal.
9. Heljardalsheiði – Frá Hólum í Hjaltadal að Atlastöðum í Svarfaðardal – 27 km
   Þarna eru erfið vatnsföll og mikil hækkun – og þessa leið fer ég ekki nema í góðum hópi með tryggan flutning frá endamarki.

Sem fyrr segir gæti mér dottið í hug að hlaupa einhverjar þessara leiða fyrirvaralaust, þ.e.a.s. nánast í kyrrþey. En ég mun samt gera mitt besta til að upplýsa um áformin, þótt seint verði, á Fésbókarsíðu fjallvegahlaupaverkefnisins.

Ég er því miður ekki búinn að skrifa neinn fróðleik um þessar mögulegu leiðir á fjallvegahlaupasíðuna (undir Næstu hlaup), en mögulega rætist eitthvað úr því næstu daga.

Sumarið í sumar er 8. sumarið í öðrum áfanga fjallvegahlaupaverkefnisins, en allt byrjaði þetta upp úr fimmtugsafmælinu mínu árið 2007. Fyrsta áfanganum lauk á sextugsafmælinu 2017 og þá var gefin út bók um 50 fyrstu leiðirnar. Bók nr. 2 með næstu 50 leiðum er svo væntanleg á sjötugsafmælinu 2027. Af þeim 50 leiðum eru 30 að baki, þannig að ég þarf eiginlega að klára næstu 20 í sumar og tvö næstu sumur, þ.e.a.s. næstum 7 leiðir á ári. En þetta er svo sem ekki lengi gert þegar maður fer í málið. Nóg er til af óhlaupnum fjallvegum!

(Myndin sem fylgir þessari færslu var tekin á Hesteyri eftir nokkur fjallvegahlaup á Hornströndum fyrir ári síðan. Það kemur nefnilega fyrir að hlaupaskór blotni í svona ferðum. (Ljósm. Arnór Freyr Ingunnarson)).

Næsta laugardag, 9. september, ætla ég að hlaupa yfir Mosa úr Brekkudal í Saurbæ yfir í Brunngilsdal í Bitrufirði, nánar tiltekið frá Bessatungu að Brunngili, u.þ.b. 17 km leið með allt að 800 m samanlagðri hækkun. Þetta verður síðasta fjallvegahlaupið mitt þetta árið og það áttugasta frá upphafi. Ástæðan fyrir því að ég valdi þessa leið og þennan tíma er sú að um þetta leyti eru liðin 115 ár frá fæðingu pabba, en hann fæddist á Brunngili 11. september 1908. Og að öllum líkindum fór hann stundum yfir Mosa til smíðavinnu í Saurbænum. Þetta er því bæði fjallvegahlaup og minningarhlaup.

Veðurspáin fyrir laugardag er sæmileg, en eins og staðan er þegar þetta er skrifað (á þriðjudagskvöldi) er útlit fyrir norðaustan golu eða kalda á þessu svæði, lítils háttar rigningu og 6-7 stiga hita á láglendi. Leiðin fer hæst í u.þ.b. 620 m og þar uppi má gera ráð fyrir að hitastigið verði komið niður undir núll. Þar af leiðandi er mikilvægt að vera vel búinn til ferðalaga. Með öðrum orðum þarf að klæðast sæmilega hlýjum hlaupafötum og hafa húfu, hanska, regnföt og álteppi meðferðis.

Bílvegurinn milla endapunkta hlaupsins (Bessatungu og Brunngils) er í lengra lagi og því geta flutningar á fólki og farangri verið snúnir. Til að einfalda þetta ætla ég að hlaupa sömu leið til baka að loknu fjallvegahlaupi. Þar með verður dagleiðin öll um 34 km og samanlögð hækkun allt að 1.600 m.

Leiðarlýsing fyrir Mosa er komin á sinn stað hér á fjallvegahlaupasíðunni. Myndin sem birtist efst á þeirri síðu var tekin við rústir íbúðarhússins á Brunngili í fjallvegahlaupi í norðan slagviðri og kulda á 100 ára afmæli pabba 11. september 2008. Á myndinni glittir líka í grjótgarðinn sem Jón Jónsson, langafi minn, hlóð í kringum túnið einhvern tímann eftir 1860.

Ykkur er að sjálfsögðu öllum velkomið að slást í för með mér á laugardaginn, þ.e.a.s. þeim sem treysta sér í svona dagleiðir og mæta nógu vel búin til að takast á við haustið. Hlaupið hefst neðan við Bessatungu kl. 11 á laugardaginn og má helst ekki taka lengri tíma en 8 klst. fram og til baka.

Á morgun, þriðjudaginn 15. ágúst, ætla ég að hlaupa tvo fjallvegi í Ísafjarðardjúpi. Þetta er í raun gert til að bæta upp að ekki tókst að ljúka áætluðum hlaupum á Austurlandi í síðasta mánuði vegna þoku. Þegar þetta er skrifað eru fjallvegahlaupin orðin samtals 77 og stefnan er að ljúka 100 hlaupum fyrir haustið 2026. Þegar sumarið í sumar er liðið verða bara þrjú sumur eftir til ráðstöfunar og takmörk fyrir því hversu mörgum hlaupum er hægt að ljúka á hverju sumri. Þess vegna var þessi skyndiákvörðun tekin.

Fjallvegir morgundagsins eru Skötufjarðarheiði frá Kálfavík í Skötufirði yfir í Heydal (um 14 km með ca. 600 m hækkun) og Eyrarfjall úr botni Mjóafjarðar yfir í Ísafjörð (gamli bílvegurinn, um 11 km með ca. 400 m hækkun). Tímaáætlun dagsins er í grófum dráttum sem hér segir:

Kl. 10:00 Lagt af stað á Skötufjarðarheiði upp Grafarskarð (eða Grafargil) í landi Kálfavíkur
Kl. 13:00-13:30 Komið að Heydal (að hótelinu)
Kl. 14:00-14:30 Lagt af stað frá Heydal áleiðis inn í Mjóafjarðarbotn (um 7 km „ferjuleið“)
Kl. 15:00-15:30 Lagt af stað á Eyrarfjall
Kl. 16:30-17:30 Komið niður í Ísafjörð

Líta ber á tímasetningarnar hér að framan (aðrar en þá fyrstu) sem lausleg viðmið. Talsverð frávik í báðar áttir eru hugsanleg, allt eftir því hvernig ferðalaginu miðar. Þau sem vilja vera með ættu því að vera í sambandi áður en lagt er af stað, (sími 8620538, Stefán). Að vanda eruð þið öll velkomin á eigin ábyrgð, þó að eðlilega muni hinn stutti fyrirvari draga úr þátttöku ef eitthvað er. Beðist er velvirðingar á því.

Rétt er að nefna að leiðirnar upp á Skötufjarðarheiði og niður af henni aftur eru býsna brattar. Þarna hefur samt verið farið yfir með kýr, þannig að væntanlega er þetta ekki ofvaxið frískum hlaupurum og göngufólki.

Fjallvegahlaupin um Kækjuskörð og Tó, sem áformuð voru á morgun, mánudaginn 24. júlí 2023, verða látin bíða betri tíma. Ólíklegt er að þessi hlaup verði hlaupin á þessu ári úr því sem komið er, en áform sem uppi eru á hverjum tíma verða kynnt hér á síðunni jafnóðum.

Vonandi hefur þessi breyting á fjallvegahlaupadagskránni sem minnst óþægindi í för með sér fyrir áhugafólk um fjallvegahlaup.