Nú styttist í fjallvegahlaupin þrjú á Vestfjörðum. Svona lítur áætlunin út:

1. Fimmtudagur 16. júlí kl. 10:00: Breiðadalsheiði
   Gamli bílvegurinn frá Skutulsfirði til Önundarfjarðar (um 12 km)
   Lagt af stað við vegamót Skutlsfjarðarbrautar og Vestfjarðavegar, rétt hjá Bónusi
2. Föstudagur 17. júlí kl. 10:00: Hrafnseyrarheiði
   Gamli bílvegurinn frá Hrafnseyri til Þingeyrar (um 17 km)
   Lagt af stað frá vegamótum við Hrafnseyri, um 14 km vestan við syðri enda Dýrafjarðarganga
   (Ath.: Búið að hafa endaskipti á leiðinni)
3. Sunnudagur 19. júlí kl. 10:00: Heiðarskarð
   Frá Reiðhjallavirkjun í Bolungarvík til Hnífsdals (11,2 km)
   Lagt af stað frá stöðvarhúsi Reiðhjallavirkjunar, tæpum 5 km innan við þjóðveginn innst í Bolungarvík.

Nánari upplýsingar verða settar inn hér og/eða á Facebooksíðu fjallvegahlaupaverkefnisins þegar nær dregur. Þar verður líka tilkynnt um breytingar sem kunna að verða á áætluninni.

Hlaupin þrjú verða nr. 93, 94 og 95 af þessum 100 sem verða hlaupin í Fjallvegahlaupaverkefninu. Að vanda er öllum velkomið að slást í för með mér á eigin ábyrgð. Þátttakan kostar ekki neitt nema fyrirhöfnina og engrar skráningar er krafist. Hins vegar er gott að láta vita af hugsanlegri þátttöku til að auðveldara verði að hópast í bíla.

Vonast til að sjá sem flest ykkar fyrir vestan. Það vill líka svo til að Hlaupahátíð á Vestfjörðum stendur yfir þessa sömu daga. Vesturgatan verður til að mynda hlaupin á laugardeginum (18. júlí). Upplagt að nýta ferðina í það líka!

Veðurvaktin spáir ljómandi góðu veðri fyrir vestan þessa daga. Þau sem eru að hugsa um að taka þátt í þessum hlaupum eru hvött til að fylgjast með þróun veðurspár á https://www.blika.is. Skjáskotið hér að neðan er fengið að láni þar:

Þetta síðasta fjallvegahlaupasumar hefur farið hægt af stað, þar sem meiðsli hafa sett strik í reikninginn. Enn eru átta fjallvegir af 100 óhlaupnir og þessa fjallvegi þarf að afgreiða þrátt fyrir meiðslin. Þess vegna stefni ég að því að hlaupa eftirtaldar leiðir á Vestfjörðum upp úr miðjum júlí:

1. Fimmtudag 16. júlí: Breiðadalsheiði
   Gamli bílvegurinn frá Skutulsfirði til Önundarfjarðar (um 12 km)
2. Föstudag 17. júlí: Hrafnseyrarheiði
   Frá Þingeyri til Hrafnseyrar (um 17 km)
3. Sunnudag 19. júlí: Heiðarskarð
   Frá Bolungarvík til Hnífsdals (11,2 km)

Leiðarvalið ber þess merki að aflagðir bílvegir hafa verið teknir framyfir hrjóstrugri heiðar. Það er gert til að draga úr hnjaski og auka líkur á að mér takist að ljúka verkinu í tæka tíð.

Nánari upplýsingar verða settar inn hér og/eða á Facebooksíðu fjallvegahlaupaverkefnisins þegar nær dregur. Þar verður líka tilkynnt um breytingar sem kunna að verða á áætluninni.

Að vanda er öllum velkomið að slást í för með mér á eigin ábyrgð. Þátttakan kostar ekki neitt nema fyrirhöfnina og engrar skráningar er krafist. Hins vegar er gott er að láta vita af hugsanlegri þátttöku til að auðveldara verði að hópast í bíla.

Vonast til að sjá sem flest ykkar fyrir vestan. Það vill líka svo til að Hlaupahátíð á Vestfjörðum stendur yfir þessa sömu daga. Vesturgatan verður til að mynda hlaupin á laugardeginum (18. júlí). Upplagt að nýta ferðina í það líka!

(Ath.: Uppfært 7.7.2026 með tenglum og breyttum upplýsingum um Heiðarskarð).

Fjallvegahlaupin sem áformuð voru í Skagafirði og nágrenni (Ketuvegur og Ólafsfjarðarskarð) 6. og 7. júní nk. frestast um óákveðinn tíma. Ástæðan eru meiðsli sem þurfa lengri tíma til að lagast en upphaflegar vonir stóðu til. Framhaldið skýrist þegar líður á júní.

Laugardaginn 6. og sunnudaginn 7. júní stefni ég að því að hlaupa tvo fjallvegi á Norðurlandi vestra.

Fyrri daginn, þ.e.a.s. á laugardeginum, er ætlunin að hlaupa um Ketuveg yfir Skagaheiði, nánar tiltekið frá Steinnýjarstöðum utan við Skagaströnd að Ketu á Skaga. Þessi leið er um 23 km með lítilli hækkun, þar sem leiðin fer hæst í u.þ.b. 200 m.y.s. Undirlagið er misgott, en víða mun hægt að fylgja sæmilegum jeppaslóðum sem veiðimenn nota til að komast að einhverjum þeirra u.þ.b. 40 veiðivatna sem finna má á heiðinni. Annars staðar er leiðin seinfarnari, og lítið um kennileiti. Þar við bætast svo „viðsjárverð veður, algeng þoka með tilheyrandi villuhættu, draugar og skrímsli“. Stefnt er að brottför frá Steinnýjarstöðum um kl. 11.

Síðari daginn, þ.e.a.s. á sunnudeginum, er stefnan tekin á Ólafsfjarðarskarð, frá Þverá í Ólafsfirði að Ketilási í Fljótum. Þessi leið er um 16 km með töluverðri hækkun, þar sem hæsti punktur er nálægt 740 m.y.s. Fyrsti spölurinn fylgir greinilegum vegarslóða inn Kvíabekkjardal, þar sem Hólabiskup rak á sínum tíma (1323-1331) spítala fyrir presta sem ekki voru vinnufærir vegna elli eða kulnunar í starfi. Leiðin er að öllum líkindum auðrötuð, en mögulega er snjór uppi í skarðinu og þegar niður er komið þarf að vaða á. Stefnt er að brottför frá Þverá um kl. 11.

Báðar leiðirnar voru á dagskrá fjallvegahlaupaverkefnisins sömu daga fyrir ári síðan, en þá var ferðalögum frestað vegna júníhrets sem gekk yfir Norðurland. Í þetta skipti ríkir hins vegar bjartsýni um gott veður og góða samveru glaðra fjallvegahlaupara. Öllum er velkomið að slást í hópinn á eigin ábyrgð. Engrar skráningar er krafist, en gott er að láta vita af hugsanlegri þátttöku til að auðveldara verði að hópast í bíla.

Vonast til að sjá sem flest ykkar fyrir norðan.

Upplýsingar um fjallvegahlaup sumarsins eru uppfærðar á Næstu hlaup jafnóðum og áformin skýrast.

Eins og fram hefur komið hefst 92. fjallvegahlaupið kl. 10 nk. laugardag, 9. maí. Leiðin liggur yfir Lyngdalsheiði eftir gamla Gjábakkaveginum frá Gjábakka í Þingvallasveit að Laugarvatni. Hér koma nokkur grundvallaratriði varðandi hlaupið:

• Rúta fer frá Menntaskólanum á Laugarvatni (ML) (Skólatúni 1, 840 Laugarvatn) kl. 9:30 á laugardagsmorgninum að rásmarkinu við Gjábakka. Sá akstur tekur um 20 mín.
• Fargjaldið er 3.500 kr/mann. Best er að greiða það í rútunni. Posi verður til reiðu á staðnum.
• Hlaupið hefst við Gjábakka kl. 10. Upplýsingar um leiðina má finna á þar til gerðri síðu á þessum vef.
• Hlaupaleiðin er um 16 km með um 260 m hækkun. Hlaupið er eftir gömlum malarvegi.
• Hlaupið endar við ML.
• Fontanaböðin á Laugarvatni eru lokuð til 1. júní vegna viðhalds og breytinga, en samkvæmt upplýsingum á heimasíðu Bláskógabyggðar opnar sundlaugin á staðnum kl. 10 á laugardögum.

Sjáumst glöð á laugardagsmorgun.

Fjallvegahlaupasumarið 2026 hefst nk. laugardag 9. maí nk. kl. 10:00 með hlaupi yfir Lyngdalsheiði, nánar tiltekið eftir gamla veginum frá Gjábakka í Þingvallasveit að Laugarvatni. Þetta er nokkurn veginn sama leið og hlaupin er í hinu árlega Bláskógaskokki, hækkunin hófleg (um 260 m) og hlaupið á greiðfærum malarvegi nánast alla leið. Nánari upplýsingar og skráning eru á þar til gerðum Facebook-viðburði. Skráningin er mikilvæg, þar sem hugsanlega verður efnt til uppákomu í lok hlaupsins, þar sem fjöldinn skiptir máli. Einnig standa yfir samningaviðræður um mögulegar sætaferðir í tengslum við hlaupið. Allt verður þetta kynnt nánar í umræðu á Facebook-viðburðinum.

Hlaupið yfir Lyngdalsheiði verður 92. hlaupið í fjallvegahlaupaverkefninu mínu. Stefnt er að því að fjallvegirnir verði orðnir 100 talsins fyrir árslok, enda er ný fjallvegahlaupabók frá bókaútgáfunni Sölku væntanleg í allar helstu bókabúðir í mars 2027. Þar verða frásagnir og myndir frá síðustu 50 hlaupunum (hlaupum nr. 51-100).

Að sjálfsögðu er öllum boðið að taka þátt í Lyngdalsheiðarhlaupinu. Vegalengdin er rétt um 10 mílur (um 16 km) og hraðinn verður bara sá sem flestum hentar. Fólk má t.d. alveg ganga þetta rösklega. Fjallvegahlaupin eru jú skemmtihlaup en ekki keppni. Og staðsetning hlaupsins gerir það að verkum að stór hluti þjóðarinnar ætti að eiga tiltölulega auðvelt með að koma sér á staðinn.

Þátttakan í hlaupinu kostar ekki neitt og þátttakendur fara þetta á eigin ábyrgð. Hlaupið er skipulagt í samstarfi við bókaútgáfuna Sölku og sem fyrr segir er mikilvægt að fólk skrái sig til þátttöku með því að merkja við „Going“ í viðeigandi Facebook-viðburði. Stefnan er að þetta verði góður dagur í góðum félagsskap og (næstum örugglega) í góðu veðri.

Fyrirspurnir sem varða hlaupið má senda á stefan@environice.is.

Dagskrá tuttugasta og síðasta fjallvegahlaupasumarsins míns er að mótast þessa dagana. Núna er 91 hlaup að baki, þannig að í sumar þarf ég að bæta 9 hlaupum við til að ná hundraðinu. Fyrstu hugmyndir um dagskrá eru kynntar hér á eftir, með alls konar fyrirvörum um dagsetningar og leiðir.

Fyrsta hlaup sumarsins verður líklega annað hvort laugardaginn 9. maí eða laugardaginn 23. maí. Þá er ég að hugsa um að hlaupa yfir Lyngdalsheiði frá Gjábakka í Þingvallasveit til Laugarvatns, sem sagt aðalveginn yfir heiðina fyrir daga núverandi vegar. Þetta er nokkurn veginn sama leið og hlaupin er í hinu árlega Bláskógaskokki og vegalengdin er rétt um 10 mílur (16 km).

Fyrri partinn í júní langar mig að hlaupa tvo fjallvegi á Norðurlandi vestra, sem báðir urðu útundan í júníhretinu síðasta vor. Þetta eru Ketuvegur frá Steinnýjarstöðum utan við Skagaströnd að Ketu á Skaga (um 23 km) og Ólafsfjarðarskarð frá Þverá í Ólafsfirði að Ketilási í Fljótum (um 16 km). Seint í júní er svo hugmyndin að hlaupa um Fagranesskarð, þvert yfir Langanesið frá Hlíð í Þistilfirði að Fagranesi við Bakkaflóa (um 11 km).

Aðalfjallvegahlaupaferð ársins verður væntanlega farin á norðanverða Vestfirði, þar sem ég býst við að halda mig dagana 12.-19. júlí eða þar um bil. Þarna myndi ég vilja ná þremur fjallvegum, t.d. Heiðarskarði úr miðbæ Bolungarvíkur yfir í miðbæ Ísafjarðar (um 18 km), Breiðadalsheiði (bílveginn) frá Skutulsfirði til Önundarfjarðar (um 12 km) og Álftafjarðarheiði frá Seljalandi í Álftafirði að Kirkjubóli í Korpudal í Önundarfirði (um 20 km). Fleiri leiðir koma til greina í stað einhverra þessara þriggja, sjá Vestfjarðakaflann á hugmyndasíðunni. Ein þeirra er Álftamýrarheiði frá Hólum í Dýrafirði til Arnarfjarðar (um 16 km), en sú leið er hluti af tvöfaldri Vesturgötu sem er hluti af hinni árlegu Hlaupahátíð á Vestfjörðum.

Hundraðasta og þar með síðasta fjallvegahlaupið verður væntanlega hlaupið yfir Heljardalsheiði frá Sleitustöðum í Skagafirði að Atlastöðum í Svarfaðardal (um 31 km) laugardaginn 8. ágúst.

Eins og glöggir lesendur hafa tekið eftir er hér aðeins lagt á ráðin um átta fjallvegi en ekki níu eins og ég þarf til að klára dæmið. Allar tillögur um níunda fjallveginn eru einkar vel þegnar, bæði hvað varðar hlaupaleið og tímasetningu. Sömuleiðis væri gaman að fá ábendingar um tímasetningar hinna leiðanna átta, m.a. með tilliti til þess að áhugasamt fólk eigi sem mesta möguleika á að slást í för með mér.

Eins og áður er öllum velkomið að hlaupa þessa fjallvegi með mér – á eigin ábyrgð. Eins og fram hefur komið verður þetta síðasta fjallvegahlaupasumarið, þannig að nú fer hver að verða síðastur að njóta.

Á sunnudag og mánudag (31. ágúst og 1. september) ætla ég að hlaupa tvo fjallvegi á Ströndum, sem verða þá væntanlega fjallvegir nr. 90 og 91 í verkefninu. Báðir þessir fjallvegir voru á dagskrá í byrjun júní, en þeim ferðalögum var frestað vegna veðurs.

Dagskráin framundan er sem hér segir:

1. Sunnudagur 31. ágúst 2025 kl. 10:00:
   Tröllatunguheiði – Úr Geiradal til Steingrímsfjarðar – 26 km
   Þarna er hlaupið eftir gamla bílveginum yfir heiðina, en hann er sjaldan farinn núorðið eftir að vegur kom yfir Þröskulda og niður Arnkötludal. Ég skipulagði reyndar hlaup þarna yfir sumarið 2018, en gat svo ekki verið með sjálfur þannig að ég skráði það ekki sem fjallvegahlaup. Hlaupið hefst á vegamótunum við Vestfjarðaveg neðst í Geiradal, u.þ.b. 1 km vestan við Króksfjarðarnes, og lýkur á vegamótunum við Húsavík í Steingrímsfirði.
2. Mánudagur 1. september 2025 kl. 10:00:
   Bjarnarfjarðarháls – Frá Kleifum á Selströnd að Kaldrananesi – 13 km
   Þetta hlaup hefst við gamla bæinn á Kleifum, þar sem tengdapabbi fæddist fyrir rúmum 96 árum, og endar við kirkjuna á Kaldrananesi, sem var í sérstöku uppáhaldi hjá honum.

Veðurspáin fyrir hlaupadagana er þokkaleg. Á sunnudag er spáð norðan 5 m/sek, skýjuðu veðri og 10 stiga hita, en á mánudag norðan 7, lítils háttar rigningu og 8 stiga hita, (staðaspá fyrir Hólmavík).

Vonast til að sem flest ykkar sláist í för með mér þessa daga, þó að fyrirvarinn sé skammur.

Hér kemur endanleg (vonandi) dagskrá fyrir fjallvegahlaupin á Austurlandi næstu daga. Sunnudagurinn er óbreyttur frá síðustu áætlun, en ég er búinn að endurskipuleggja þriðjudaginn.

1. Sunnudagur 13. júlí kl. 11:00
   Gönguskarð við Njarðvík – Frá Unaósi á Héraði að Hlíðartúni í Njarðvík – 10 km
   Leiðin liggur út undir Stapavík og svo yfir skarðið. Það er ekki ýkja hátt og mun hafa verið farið á jeppa í eitt skipti, nánar tiltekið árið 1946.
2. Sunnudagur 13. júlí kl. 15:00
   Sandaskörð – Frá Hólalandi í Borgarfirði að Ánastöðum í Hjaltastaðaþinghá – 21 km
   Þessi leið fer upp í 600 m hæð og er því ekki fljótfarin. Og kannski getur tímasetningin hnikast til eftir því hvernig gengur á Gönguskarði fyrr um daginn.
3. Þriðjudagur 15. júlí kl. 10:00
   Stöðvarskarð – Frá Melrakkaeyri í Fáskrúðsfirði til Stöðvarfjarðar – 10 km
4. Þriðjudagur 15. júlí kl. 14:00
   Gunnarsskarð – Úr botni Stöðvarfjarðar að Ólafsvörðu í Breiðdal – 12 km
   (Tímasetning getur hnikast til eftir því hvernig gengur á Stöðvarskarði).

Að vanda er öllum frjálst að slást í för með mér í fjallvegahlaupunum – á eigin ábyrgð – og þátttakan kostar ekki neitt nema fyrirhöfnina. Gott væri samt að frétta af ferðafélögum fyrirfram (t.d. í síma 862 0538 eða í stefan@environice.is), einkum til að auðvelda skipulagningu ferða fyrir og eftir hlaup.

Nú styttist í fyrirhuguð fjallvegahlaup á Austurlandi. Þar er ég reyndar búinn að gera eina breytingu, þ.e. að færa hlaupin yfir Gönguskarð og Sandaskörð frá laugardegi fram á sunnudag. Þessir tveir fjallvegir verða sem sagt hlaupnir sunnudaginn 13. júlí nk. Síðan eru aðrir tveir fjallvegir á dagskrá á þriðjudag (15. júlí), en á þessari stundu er ekki 100% ljóst hvaða fjallvegir það verða. Til að einfalda flutninga verða Kækjuskörð og Tó hugsanlega látin bíða betri tíma, en í þeirra stað hlaupið yfir Stöðvarskarð milli Fáskrúðsfjarðar og Stöðvarfjarðar – og Gunnarsskarð milli Stöðvarfjarðar og Breiðdals. Þessar leiðir eru hvor um sig um 12 km og upphaf og endir beggja leiða eru í alfaraleið.

Dagskráin fyrir austan er sem sagt sem hér segir (að óbreyttu):

1. Sunnudagur 13. júlí kl. 11:00
   Gönguskarð við Njarðvík – Frá Unaósi á Héraði að Hlíðartúni í Njarðvík – 10 km
   Leiðin liggur út undir Stapavík og svo yfir skarðið. Það er ekki ýkja hátt og mun hafa verið farið á jeppa í eitt skipti, nánar tiltekið árið 1946.
2. Sunnudagur 13. júlí kl. 15:00
   Sandaskörð – Frá Hólalandi í Borgarfirði að Ánastöðum í Hjaltastaðaþinghá – 21 km
   Þessi leið fer upp í 600 m hæð og er því ekki fljótfarin. Og kannski getur tímasetningin hnikast til eftir því hvernig gengur á Gönguskarði fyrr um daginn.
3. Þriðjudagur 15. júlí kl. 10:00
   Kækjuskörð – Frá Þverárbrú í Borgarfirði að Stakkahlíð í Loðmundarfirði – 13 km
   (Ath.: Þetta gæti átt eftir að breytast).
4. Þriðjudagur 15. júlí kl. 14:00
   Tó – Frá Klyppstað í Loðmundarfirði að Gilsárteig í Eiðaþinghá – 24 km
   (Ath.: Þetta gæti átt eftir að breytast).

Að vanda er öllum frjálst að slást í för með mér í fjallvegahlaupunum – á eigin ábyrgð – og þátttakan kostar ekki neitt nema fyrirhöfnina. Gott væri samt að frétta af ferðafélögum fyrirfram (t.d. í síma 862 0538 eða í stefan@environice.is), bæði til að auðvelda skipulagningu ferða fyrir og eftir hlaup – og til að tryggja að fólk fái fréttir af mögulegum breytingum á dagskrá.

Veðurspáin fyrir sunnudaginn er hreint ágæt eins og sjá má á meðfylgjandi skjáskoti af vef Veðurstofu Íslands í kvöld. (Myndin stækkar ef smellt er á hana).