Arnarvatnsheiði á morgun

Arnarvatnsheiði áfangarÁ morgun, laugardaginn 23. júlí, er komið að síðasta og lengsta fjallvegahlaupinu í fjallvegahlaupaverkefninu. Þá ætla ég að hlaupa yfir Arnarvatnsheiði úr Miðfirði suður í Borgarfjörð í góðra vina hópi.

Leiðin yfir Arnarvatnsheiði er um 81 km og því er nauðsynlegt að taka daginn snemma til að ná til byggða á skikkanlegum tíma. Með þetta í huga ætla ég að leggja af stað úr Miðfirði kl. 5 árdegis. Hlaupið hefst á vegamótum Miðfjarðarvegar og Arnarvatnsvegar autan við brúna yfir Núpsá, gegnt bænum á Haugi, þar sem Guðný föðursystir mín bjó um árabil með eiginmanni sínum og 10 börnum. Upphafspunkturinn er um 18 km innan við Laugarbakka.

Löngum hlaupum er skynsamlegt að skipta í styttri áfanga. Þess vegna verður hlaupinu á morgun áfangaskipt eins og sýnt er á meðfylgjandi korti sem við Sævar Skaptason hjálpuðumst að við að útbúa á dögunum. (Reyndar er rétt að taka fram að við teiknuðum ekki kortið sjálft. Við bættum bara inn nokkrum X-um á vel valda staði). Kortið er illlæsilegt eins og það lítur út hér á síðunni, en stærra kort birtist ef smellt er á myndina.

Hver áfangi í hlaupi morgundagsins er um 10 km að lengd, eða nánar tiltekið á bilinu 9-14 km. Fyrrnefndur Sævar Skaptason hefur komið því til leiðar að trússbíll verður okkur til halds og trausts alla leiðina og mun bíllinn m.a. gegna hlutverki drykkjarstöðvar við lok hvers áfanga. Taflan hér að neðan sýnir áfangaskiptinguna í smáatriðum, með fyrirvara um einhverja fínstillingu eftir aðstæðum á hverjum áningarstað. Taflan er ekki vel læsileg með venjulegum gleraugum en úr því rætist sé smellt á hana.

Arnarvatnsheiði áfangaskipting

Í töflunni hér að framan er m.a. að finna áætlaðar tímasetningar á hverjum áfangastað. Þessar tímasetningar líta út fyrir að vera afar nákvæmar, en eru þó einungis settar fram til viðmiðunar. Ég geri ráð fyrir að meðalhraðinn yfir heiðina verði rétt um 6 km/klst, þ.e. röskur gönguhraði. Til þess að halda þeim hraða þarf að ljúka hverjum kílómetra á 10 mínútum. Tímaáætlun af þessu tagi er nauðsynleg í svona hlaupi, sérstaklega þegar haft er í huga að þegar hlaupinu lýkur verður haldið upp á fullkomnun fjallvegahlaupaverkefnisins með súpuveislu á Hótel Húsafelli. Þangað er öllum boðið sem tekið hafa þátt í verkefninu, þ.m.t. hlaupurum morgundagsins, enda hafi þeir boðað komu sína áður en veislan brestur á. (Þegar talað er um fullkomnun er hér átt við að verkefnið hafi verið fullkomnað, en ekki endilega að það hafi verið fullkomið (þó að hlutlaust mat mitt bendi til að svo hafi verið)).

Eins og staðan er þegar þetta er skrifað að morgni föstudags stefnir allt í að 10 manns hlaupi saman yfir heiðina á morgun. Sú þátttaka er langt umfram þær björtustu vonir sem ég hafði gert mér, enda vegalengdin tæpast við alþýðuskap. Ég geri líka ráð fyrir að fleira fólk sláist í hópinn á síðustu kílómetrunum. Eftir því sem ég best veit er vegurinn frá Kalmanstungu upp að Helluvaði á Norðlingafljóti fær öllum bílum, en þessi leið er um 20 km ef marka má töfluna hér að framan. Eins og sést á töflunni er ætlunin að ljúka hlaupinu kl. 18:30. Þeir sem vilja koma til móts við okkur geta reiknað tímasetningar út frá því, miðað við að hver km taki okkur 10 mín. að meðaltali.

Á morgun verður gaman!

10 dagar eftir af fjallvegahlaupaverkefninu

Efnisorð

, ,

Snja 060 (217x320)Nú eru bara þrjú fjallvegahlaup eftir af þessum 50 sem ég gaf mér í 5-tugsafmælisgjöf fyrir rúmum 9 árum. Á fimmtudaginn (14. júlí) kl. 14 verður lagt af stað í hlaup nr. 48 yfir Klofningsheiði frá Flateyri til Suðureyrar og næsta þriðjudag kl. 9 að morgni verður siglt af stað frá Ísafirði áleiðis í Aðalvík, þaðan sem hlaup nr. 49 verður hlaupið yfir Sléttuheiði að Hesteyri. Laugardaginn 23. júlí kl. 5 árdegis hefst svo síðasta hlaupið norður í Miðfirði, þaðan sem hlaupið verður suður Arnarvatnsheiði að Kalmanstungu í Borgarfirði.

Þeir sem ætla að hlaupa með mér yfir Klofningsheiðina þurfa bara að mæta við sundlaugina á Flateyri kl. 14 á fimmtudag. Sléttuheiðarhlaupið krefst hins vegar meiri undirbúnings, því að fyrst þarf að tryggja sér far með bátnum yfir Ísafjarðardjúp og Jökulfirði. Þar er eitt sæti laust og e.t.v. er hægt að útvega fleiri. Hafið endilega samband við mig í síma 862 0538 eða á Facebook ef þið hafið áhuga á að skella ykkur með. Eins væri gott að vita sem fyrst um þátttöku í hlaupinu yfir Arnarvatnsheiði til að hægt verði að nýta flutningsleiðir og gistimöguleika nyrðra sem best.

Drög að leiðarlýsingum fyrir þessar þrjár heiðar eru smátt og smátt að verða til hérna á fjallvegahlaupasíðunni (sjá tengla í textanum hér að framan).

Svo læt ég fljóta hér með eina mynd að vestan – af sjálfum mér. Hana tók Sævar Skaptason á Dalsheiði seint í júlí 2012 í eftirminnilegri hlaupaferð um Snjáfjallahringinn.

OLYMPUS DIGITAL CAMERA

Norðurland eftir viku

Fjallvegahlaup - tákn um frelsi. Myndin er tekin í norðanverðu Arnardalsskarði á Snæfellsnesi vorið 2016.

Fjallvegahlaup – tákn um frelsi. Myndin er tekin í norðanverðu Arnardalsskarði á Snæfellsnesi vorið 2016.

Á næstu helgi (11.-12. júní) verður röðin komin að fjallvegahlaupum nr. 46 og 47. Ég geri ráð fyrir að enginn vilji missa af þessum hlaupum og því er þessum pistli ætlað að minna á þau.

Á laugardaginn (11. júní) ætla ég að hlaupa gamla Þingmannaveginn frá Eyrarlandi í Eyjafirði yfir Vaðlaheiði að Hróarsstöðum í Fnjóskadal, já eða kannski bara að tjaldsvæðinu í Systragili sem er þar steinsnar frá. Þessi leið kvað vera um 12 km löng og 680 m há. Á leiðinni er hlaupið yfir frægt mannvirki, en það er mikil steinhleðsla yfir Systragilsdrög efst í heiðinni að austanverðu. Þarna átti upphaflega að byggja trébrú („upphaflega“ var árið 1870) með grjóthleðslum beggja vegna, en svo var ákveðið að hlaða þetta allt úr grjóti af því að margir góðir menn ætluðu það hentara. Mig grunar reyndar að grjót sé endingarbetra efni. Lagt verður upp frá Eyrarlandi kl. 13:00 á laugardag. Já, og vel á minnst: Eyrarland er austan við botn Eyjafjarðar, beint á móti Akureyrarflugvelli, um 1,5 km sunnan við hringveginn.

Sunnudaginn 12. júní verður svo tekið á rás yfir Kiðaskarð milli Skagfirska efnahagssvæðisins og þess húnvetnska. Lagt verður af stað kl. 13:00 neðan við bæinn á Mælifellsá í Skagafirði, u.þ.b. 12 km innan við Varmahlíð. Frá Mælifellsá eru tveir af mestu millivegalengda- og langhlaupurum Íslandssögunnar. Alla leiðina er hlaupið eftir vegarslóða sem kvað vera þokkalega fær fjórhjóladrifsbílum á sumrin. Dreg þó í efa að sumarið sé komið í þeim skilningi. Leiðin gæti teygst upp í 20 km og mesta hæð er líklega um 620 m.y.s. Hlaupinu lýkur við Stafnsrétt í Svartárdal, eða kannski á aðalveginum spölkorni neðar í dalnum. Þaðan er rúmlega 20 km akstur niður að Húnaveri, neðan við brekkuna upp á Vatnsskarð.

Nánari upplýsingar um þessar tvær leiðir má finna á þar til gerðum upplýsingasíðum sem birtast ef smellt er á tenglana framar í þessum pistli.

Vonast til að hlaupin um þessa fjallvegi verði fjölmenn og góðmenn. Og þegar þessir fjallvegir hafa verið hlaupnar verða ekki nema þrír eftir af þessum 50 sem málið snýst um.

Kíkt í fjallvegahlaupabókhaldið

IMG_4303webÞegar þetta er skrifað hef ég lagt að baki 45 af þeim 50 fjallvegum sem ég gaf sjálfum mér í 5-tugsafmælisgjöf fyrir rúmum 9 árum. Nú bíða aðeins 5 fjallvegir þess að verða hlaupnir og á miðnætti 23. júlí nk. verður hinum „fýsíska“ þætti verkefnisins lokið. Með þetta í huga hef ég ákveðið að opna hluta af fjallvegahlaupabókhaldinu – eins og sjá má hér að neðan. Enn er nefnilega tækifæri til að hressa upp á einstakar línur í þessu mikilvæga bókhaldi.

Helstu kennitölur eða hagstærðir bókhaldsins eru þessar eins og staðan er í dag:

  • 45 fjallvegahlaup
  • 875,16 km
  • 128:10:22 klst. (5 sólarhringar, 8 klst, 10 mín og 22 sek)
  • Meðalhraði 6,83 km/klst
  • 83 hlaupafélagar

Eftirfarandi tafla sýnir fjölda hlaupa og hlaupinna kílómetra allra hlaupafélaga sem farið hafa með mér 3 ferðir eða fleiri og hlaupið 50 km eða meira, raðað eftir fjölda ferða. Þetta er taflan sem allir hljóta að hafa beðið eftir í ofvæni:

Fjallvegahlaupabókhaldstafla 160528

Ötulustu hlaupafélagarnir 2007-2016. (Birt með fyrirvara um villur).

Þeim sem vilja breyta þessari töflu er bent á síðustu 5 fjallvegahlaupin, sem verða eins og hér segir:

  • 11.06.2016 Þingmannavegur/Vaðlaheiði – 12 km
  • 12.06.2016 Kiðaskarð – 17 km
  • 14.07.2016 Klofningsheiði – 14 km
  • 19.07.2016 Sléttuheiði – 14 km
  • 23.07.2016 Arnarvatnsheiði – 81 km

Sjáumst næst á Þingmannaveginum. Meira um það fljótlega.

Svínbjúgur á þriðjudag

Efnisorð

, ,

Svínbjúgur wikiloc 200Síðdegis á þriðjudag (24. maí) er röðin komin að fjallvegahlaupi nr. 45 frá Hóli í Hörðudal um Svínbjúg. Hlaupinu lýkur svo við suðurenda Hítarvatns. Hlaupaleiðin er samtals um 22 km að lengd, en henni er lýst nánar á þar til gerðri síðu hér á vefnum.

Lagt verður upp frá eyðibýlinu Hóli í Hörðudal um kl. 16:00 á þriðjudaginn. Að Hóli er um 80 km akstur frá Borgarnesi um Bröttubrekku. Beygt er til vinstri út af aðalveginum um 6,5 km sunnan við Búðardal og ekið sem leið liggur með stefnu á Stykkishólm. Eftir um 7 km akstur eftir þeim vegi er aftur tekin vinstri beygja inn á vestari Hörðudalsveginn. Þá eru um 3 km eftir heim á hlað á Hóli.

Hlaupið endar sem fyrr segir sunnan við Hítarvatn. Að endamarkinu er rúmlega 40 km akstur frá Borgarnesi, fyrst sem leið liggur vestur á Mýrar (um 20 km) og svo upp Hítardalsveg (aðrir 20 km). Síðasti spölurinn frá bænum í Hítardal og upp að vatni er líklega frekar grófur, en leiðin ætti þó að vera fær öllum bílum.

Vonast til að njóta samvista við sem flesta á þessari skemmtilegu leið á þriðjudaginn, þrátt fyrir að þetta sé virkur dagur. Veðurspáin gæti reyndar verið hagstæðari, en búast má við strekkingsmótvindi, rigningu og u.þ.b. 8 stiga hita.

Fjallvegahlaupadagskráin 2016

Nú er ekki seinna vænna að fastsetja dagskrá fjallvegahlaupaverkefnisins sumarið 2016, sem er eins og alþjóð veit síðasta sumar verkefnisins. Það hefur vafist fyrir mér að koma þessari dagskrá saman enda ljóst að hún verður meira krefjandi en nokkru sinni fyrr. Þetta leit allt vel út í árslok 2014, 8 sumur og 40 hlaup búin og 2 sumur og 10 hlaup eftir, alveg eins og það átti að vera. En sumarið 2015 brá svo við að af ólíkum ástæðum kláraði ég ekki nema 3 hlaup og á því 7 stykki eftir fyrir þetta síðasta sumar. Og ég var löngu búinn að ákveða að síðasta hlaupið skyldið hlaupið 23. júlí, þannig að tíminn er frekar naumur. Á dagskránni þarf líka að vera pláss fyrir Þrístrending, Hamingjuhlaup, einhver keppnishlaup og jafnvel fyrir verkefni á borð við vinnu og fjölskyldu. En hvað um það. Fjallvegahlaupadagskráin liggur fyrir og verður tíunduð í þessum pistli, með venjulegum fyrirvara um breytingar.

1. Arnardalsskarð, laugardag 21. maí 2016 (Hlaup #44)
Arnardalsskarð er um 14 km leið þvert yfir Snæfellsnes frá Bláfeldi í Staðarsveit til Grundarfjarðar. Leiðin er brött upp að sunnanverðu og fer líklega í 700 m hæð þar sem hæst er. Þar uppi má búast við snjó á þessum árstíma, en það ræðst eðlilega af veðurfari næstu mánaða. Líklega verður lagt í hann strax eftir hádegi, t.d. kl. 13:00, en það verður nánar kynnt þegar nær dregur.

2. Svínbjúgur, þriðjudag 24. maí 2016 (Hlaup #45)
Svínbjúgur er gömul leið úr Hörðudal suður að Hítardal á Mýrum. Þessi leið er lengi búin að vera í sigti hjá mér, en ég hafði upphaflega hugsað mér að hlaupa hana til norðurs. Nú er ég búinn að skipta um skoðun og ætla að hefja hlaupið við Hól í Hörðudal. Vegalengdin gæti verið allt frá 22 km upp í 30 km. Síðarnefnda talan gildir ef hlaupið er alla leið til bæjar í Hítardal. Býst við að sú verði raunin. Sjálfur þekki ég ekki leiðina, en Jónas Kristjánsson segir að þetta sé „skemmtilegasta leiðin um hálendið milli Mýra og Dala, enda er hún með öllu ófær jeppum“. Þarna á ég líka eftir að ákveða nákvæma tímasetningu, en fyrsta tillaga er að leggja af stað úr Hörðudal kl. 16:00. Þetta er jú á virkum degi.

3. Þingmannavegur/Vaðlaheiði, laugardag 11. júní 2016 (Hlaup #46)
Þingmannavegur er gömul leið yfir Vaðlaheiði, frá Eyrarlandi í Eyjafirði að Hróarstöðum í Fnjóskadal. Þetta munu vera 12 km og á leiðinni gefur að líta dæmi um einkar vandaðar veghleðslur frá fyrri tíð. Ég geri ráð fyrir að leggja af stað úr Eyjafirði kl. 13:00, þar til annað verður ákveðið.

4. Kiðaskarð, sunnudag 12. júní 2016 (Hlaup #47)
Kiðaskarð er um 17 km löng leið frá Mælifelli í Skagafirði að Stafnsrétt í Svartárdal. Mér skilst að þessi leið sé jeppafær að sumarlagi og mesta hæð í skarðinu er líklega um 550 m.y.s. Býst við að leggja af stað frá vegamótum við Mælifellsá kl. 13:00.

5. Þrístrendingur, laugardag 18. júní 2016
Sumarið 2016 verður Þrístrendingur hlaupinn í sjöunda sinn. Lagt verður upp frá Kleifum í Gilsfirði kl. 10:30 árdegis, hlaupið norður Steinadalsheiði í botn Kollafjarðar á Ströndum, þaðan yfir Bitruháls að æskuheimili mínu í Gröf og loks þaðan suður Krossárdal að Kleifum. Leiðin öll er rúmir 40 km, og á henni eru þrír fjallvegir. Þetta er ekki hluti af fjallvegahlaupaverkefninu, því að þessar leiðir hef ég farið oft áður. En þessi hlaup eru alltaf skemmtileg! Ferðasögur frá liðnum sumrum eru geymdar í gagnaverum víða um heim. Dæmi um það er ferðasagan frá sumrinu 2015.

6. Hamingjuhlaupið, laugardag 2. júlí 2016
Þennan dag verður kominn tími á 8. Hamingjuhlaupið, en það tilheyrir flokki gleðihlaupa rétt eins og Þrístrendingur. Þarna er hlaupið eftir fyrirfram gerðri tímaáætlun sem svipar mjög til strætisvagnaáætlunar. Hamingjuleiðin 2016 er ekki endanlega ákveðin en flest bendir til að hlaupið hefjist í Bjarnarfirði syðri. Alla vega lýkur því á Hólmavík, enda er viðburðurinn hluti af hinni sívinsælu bæjarhátíð Hamingjudögum. Vegalengdin verður sennilega með styttra móti þetta árið, varla mikið meira en 25-30 km. Þetta verður allt kynnt miklu betur þegar nær dregur.

7. Klofningsheiði, fimmtudag 14. júlí 2016 (Hlaup #48)
Hlaupið yfir Klofningsheiði hefst á Flateyri. Þegar komið er niður af heiðinni er hlaupið niður Sunddal og Staðardal til Keravíkur, út fyrir Spilli og inn til Suðureyrar við Súgandafjörð. Leiðin upp er brött og hæst er farið í rúmlega 600 m hæð. Vegalengdin er áætluð um 14 km.

8. Vesturgatan, sunnudag 17. júlí 2016
Það vill svo skemmtilega til að Hlaupahátíðin á Vestfjörðum verður einmitt haldin dagana eftir Klofningsheiðarhlaupið. Hátíðin hefst á fimmtudag eða föstudag og nær hápunkti með Vesturgötunni á sunnudag. Þar ætla ég að vera, enda fær maður hvergi betri móttökur. Vesturgatan er ekki hluti af fjallvegahlaupaverkefninu en ég nefni hana hérna samt. Hún fellur svo vel að þessu öllu saman. Mæli með að hlauparar fjölmenni þangað.

9. Sléttuheiði, þriðjudag 19. júlí 2016 (Hlaup #49)
Hlaupaleiðin sem um ræðir liggur frá Sæbóli í Aðalvík, inn Staðardal, upp Fannadal, yfir Sléttuheiði og inn Hesteyrarbrúnir að Hesteyri. Leiðin er greiðfarin en gróf og eitthvað um 14 km að lengd. Siglt verður með báti frá Ísafirði að Sæbóli kl. 9 um morguninn og til baka frá Hesteyri um kl. 18:30. Þeir sem ekki treysta sér til að hlaupa Sléttuheiðina geta keypt sér gönguferð með leiðsögn þessa sömu leið og eru bátsferðirnar þá innifaldar. Það er með öðrum orðum frekar einfalt að gera meira en bara hlaupaferð úr þessu. Bátsferðin ein og sér kostar tæplega 20 þús. kr. báðar leiðir og gönguferðin tæplega 30 þús. kr. með siglingum. Ef 10 manns taka sig saman og mynda hóp fæst afsláttur.

10. Arnarvatnsheiði, laugardag 23. júlí 2016 (Hlaup #50)
Arnarvatnsheiðin verður síðasti fjallvegurinn í fjallvegahlaupaverkefninu. Lagt verður af stað kl. 5:00 árdegis úr Miðfirði þar sem Arnarvatnsheiðarvegur hefst og endað í námunda við Kalmanstungu í Borgarfirði um kl. 18:30. Samkvæmt upplýsingum Vegagerðarinnar er þessi spölur 81,41 km og þar með langlengsti fjallvegurinn í verkefninu. Að hlaupi loknu verður fjallvegahlaupaverkefnið kvatt með formlegum hætti og verður sá viðburður kynntur nánar fljótlega.

Sem fyrr segir er þetta allt birt með fyrirvara um breytingar. Þær verða kynntar jafnóðum og þeirra verður vart.

Vonast til að njóta félagsskapar sem flestra á þessu síðasta sumri fjallvegahlaupaverkefnisins. Gott er að fá sem mest viðbrögð við dagskránni sem fyrst. Þá er líka auðveldara að laga áformin að „þörfum markaðarins“.

Í fjallvegahlaupum er alltaf gaman og alltaf gott veður (ja, nema kannski stundum). Þessi mynd er tekin í Gervidal á leið upp á Skálmardalsheiði í ágúst 2014.

Í fjallvegahlaupum er alltaf gaman og alltaf gott veður (ja, nema kannski stundum). Þessi mynd var tekin í Gervidal á leið upp á Skálmardalsheiði í ágúst 2014. Þá var gott veður en ekki átakanlega hlýtt.

Unnið að sagnaritun

Fjallvegahlaupin mín skiptast eiginlega í þrjá verkþætti. Fyrst þarf að velja leiðir og taka saman ýmsan fróðleik um þær. Svo þarf að hlaupa þessar leiðir. Síðasti verkþátturinn er að skrifa ferðasöguna. Sá verkþáttur á það til að dragast, en myndir úr ferðalögunum hressa upp á minnið þegar loks er sest niður við sagnaritun.

Þegar þetta er skrifað hafa 43 fjallvegir verið hlaupnir en um 10% af ferðasögunum eru enn óskrifaðar. Í gær birtist saga af Reykjaheiði frá því í ágúst 2014 og uppi eru fögur áform um að ljúka öðrum skrifum hið fyrsta. Reyndar er skrifum seint fulllokið því lengi er hægt að lagfæra og bæta inn upplýsingum og heimildum. Það gerist smátt og smátt.

Og nú styttist líka í að fjallvegahlaupadagskráin fyrir árið 2016 líti dagsins ljós. Á þeirri dagskrá verða 7 fjallvegir, fleiri en nokkru sinni fyrr. Ástæðan er sú að árið 2016 er 10. ár fjallvegahlaupaverkefnisins – og þar með líka það síðasta. Leiðirnar sjö verða hver annarri skemmtilegri.

Á hlaupum upp Reykjaheiði 7. ágúst 2014. (Ljósm. Sævar Skaptason).

Á hlaupum upp Reykjaheiði 7. ágúst 2014. (Ljósm. Sævar Skaptason).

Haukadalsskarð á laugardaginn

Efnisorð

Haukadalsskarð kort lmí einfÁ laugardaginn er komið að því að hlaupa yfir Haukadalsskarð frá Smyrlhóli í Haukadal í Dölum langleiðina að Staðarskála í Hrútafirði. Ætlunin er að hefja hlaupið kl. 10 árdegis og má ætla að skokkið yfir í Hrútafjörð taki 2,5 til 3,5 klst. Vegalengdin er um 20 km.

Hlaupið yfir Haukadalsskarð verður fjallvegahlaup nr. 43. Að því loknu verða því 7 fjallvegir eftir af fjallvegahlaupaverkefninu. Að meðaltali hef ég hlaupið 5 fjallvegi á ári, en verð líklega nokkuð á eftir áætlun í lok þessa árs. Haukadalsskarðið verður e.t.v. síðasti fjallvegur ársins, en enn er þó hugsanlegt að eitthvað bætist við í lok sumars eða með haustinu. Þau mál eru í athugun.

Leiðarlýsingin fyrir Haukadalsskarð er enn að mestu óskrifuð, en upplýsingar um hlaupið er annars að finna á hlaup.is. Gott væri að fá einhverja nasasjón af þátttöku fyrirfram. Það gæti auðveldað fólkflutninga milli endamarks og upphafsstaðar.

Vonast til að sem flestir sláist í för með mér á laugardaginn. Öllum er velkomið að taka þátt, enda gera hlauparar það á eigin ábyrgð.

Sjáumst við þá ekki bara á laugardaginn?

Austfirðir í næstu viku

Efnisorð

,

Nú er kominn tími til að bæta fjallvegum nr. 42 og 43 í safnið. Fjallvegur nr. 42 verður Víkurheiði og Dys sem ég ætla að hlaupa þriðjudaginn 4. ágúst kl. 11. Legg þá af stað frá Kerlingará utan við Stóru-Breiðuvík í Reyðarfirði. Fjallvegur nr. 43, Berufjarðarskarð, verður svo hlaupinn tveimur dögum síðar, þ.e.a.s. fimmtudaginn 6. ágúst kl. 11. Þá hefst hlaupið við bæinn Höskuldsstaði í Breiðdal.

Fjallvegahlaupin eru ekki keppnishlaup, heldur snúast þau um útiveru, hreyfingu og góðan félagsskap. Þátttökugjöld eru engin og öllum er frjálst að slást í hópinn á eigin ábyrgð. Þátttakendur þurfa ekkert að skrá sig, en samt er gott að hafa einhverja hugmynd um hverjir ætla að vera með. Þá er líka auðveldara að nýta ferðir og svoleiðis.

Fyrstu drög að leiðarlýsingum þessara tveggja leiða er að finna hérna á fjallvegahlaupasíðunni undir „Næstu hlaup“. Þar eru m.a. GPS-punktar sem gott er að eiga í handraðanum. Ef allt gengur að óskum bæti ég einhverjum upplýsingum þarna við næstu daga. Svo er líka eitthvað um þetta hlaup.is, (sjá tengla ofar í þessari færslu).

Sjáumst í næstu viku!

Víkurheiði og Dys

Víkurheiði og Dys

Berufjarðarskarð

Berufjarðarskarð

Flatnavegur á laugardaginn

Nú er komið að því: Fyrsta fjallvegahlaup ársins og það 41. frá upphafi verður hlaupið á laugardag (30. maí). Hlaupið hefst kl. 15:00 við Rauðamelsölkeldu í Eyja- og Miklaholtshreppi og lýkur við Setberg, neðst í Litla-Langadal á Skógarströnd. Vegalengdin er u.þ.b. 20 km og hæsti punktur á leiðinni eitthvað um 250 m.y.s.

Leiðin að rásmarkinu við Rauðamelsölkeldu er auðrötuð. Frá hringtorginu á Vesturlandsvegi ofan við Borgarnes er ekið sem leið liggur til vesturs eftir þjóðvegi nr. 54 um 41 km vestur af Haffjarðará. Um það bil 2,5 km vestan við ána er beygt til hægri, ekið fram hjá Gerðubergi og staðnæmst á vesturbakka Flatnaár, tæpa 7 km frá aðalveginum.

Leiðin að endamarkinu er sömuleiðis frekar auðrötuð. Þá er ekið vestur Mýrar og síðan norður Heydalsveg (þjóðveg nr. 55). Þegar komið er norður yfir er beygt vestur Skógarströnd. Eftir um 19 km akstur er beygt inn í Litla-Langadal, en vegamótin þar láta lítið yfir sér. Frá vegamótunum er um 2 km akstur að bænum Setbergi, sem er auðþekktur af reisulegu tveggja hæða íbúðarhúsi með grænu þaki. Þar endar hlaupið sem sagt. Vegalengdin frá Borgarnesi að Setbergi er u.þ.b. 85 km. Nánari staðsetningar með gps-hnitum má sjá á fjallvegahlaup.is.

Að vanda er öllum velkomið að taka þátt í hlaupinu á eigin ábyrgð. Þátttakendur þurfa sjálfir að koma sér á upphafspunktinn og frá lokapunktinum, en af umhverfisástæðum er hvatt til að fólk sameinist um bíla eftir föngum.

Nánari upplýsingar um hlaupið er að finna á fjallvegahlaup.is og hlaup.is. Ef eitthvað er óljóst er um að gera að hafa samband í síma 862 0538 eða á stefan@environice.is.

Vonast til að sjá sem flesta á laugardaginn.

Flatnavegur kort lmí 960