Fjallvegahlaupadagskrá sumarsins 2026 er smám saman að skýrast. Í sumar ætla ég að hlaupa níu leiðir og þar með verður heildartalan komin upp í 100. Þá er mál að linni. Sumarið 2026 verður sem sagt ekki bara tuttugasta heldur líka síðasta sumar fjallvegahlaupaverkefnisins.

Fjallvegahlaup sumarsins hófust laugardaginn 9. maí og lýkur laugardaginn 8. ágúst. Dagsetningar þar á milli eru flestar enn í vinnslu. En í grófum dráttum mun þetta líta svona út:

1. Laugard. 9. maí, kl. 10:00: Lyngdalsheiði
   frá Gjábakka í Þingvallasveit til Laugarvatns (16 km). (LOKIÐ)
2. Laugardagur 6 júní, kl. 11:00: Ketuvegur  FRESTAÐ
   (yfir Skagaheiði) frá Steinnýjarstöðum utan við Skagaströnd að Ketu á Skaga (um 23 km).
3. Sunnudagur 7. júní, kl. 11:00: Ólafsfjarðarskarð   FRESTAÐ
   frá Þverá í Ólafsfirði að Ketilási í Fljótum (um 16 km).
4. Um mánaðarmótin júní/júlí, (líklega miðvikudag 1. júlí): Fagranesskarð
   þvert yfir Langanesið frá Hlíð í Þistilfirði að Fagranesi við Bakkaflóa (um 11 km).
5. 12.-19. júlí: Þrír fjallvegir á norðanverðum Vestfjörðum,
   líklega Heiðarskarð úr miðbæ Bolungarvíkur yfir í miðbæ Ísafjarðar (um 18 km) og Breiðadalsheiði (bílvegurinn) frá Skutulsfirði til Önundarfjarðar (um 12 km). Þar við bætist svo t.d. Álftafjarðarheiði frá Seljalandi í Álftafirði að Kirkjubóli í Korpudal í Önundarfirði (um 20 km). Fleiri leiðir koma til greina í stað einhverra þessara þriggja, sjá Vestfjarðakaflann á hugmyndasíðunni. Allar ábendingar eru vel þegnar.
6. Sjá nr. 5.
7. Sjá nr. 5.
8. Seint í júlí: Óákveðið,
   en mögulega eitthvað auðvelt og aðgengilegt eins og t.d. Sölvamannagötur eða Húksleið, sem báðar byrja eða enda í Hrútafirði.
9. Laugard. 8. ágúst: Heljardalsheiði
   frá Sleitustöðum í Skagafirði að Atlastöðum í Svarfaðardal (um 31 km)
   Hlaupið yfir Heljardalsheiði verður 100. fjallvegahlaupið frá upphafi – og að hlaupi loknu verður þeim tímamótum fagnað á einhvern hátt, sem nánar verður kynntur síðar.

Allt er þetta birt með alls konar fyrirvörum um dagsetningar og leiðir.

Eins og áður er öllum velkomið að hlaupa þessa fjallvegi með mér – á eigin ábyrgð. Eins og fram hefur komið verður þetta síðasta fjallvegahlaupasumarið, þannig að nú fer hver að verða síðastur að njóta.

(Síðast uppfært 28. maí 2026)