Hrafnseyrarheiði

Staðsetning: Frá Hrafnseyri til Þingeyrar
Hnattstaða: 
Upphaf:    0,00 km ( 10 m), N65°45,62' - V23°27,99'
Háheiðin:  7,35 km (517 m), N65°48,41' - V23°26,04'
Lok:      16,99 km ( 10 m), N65°52,29' - V23°28,82'
Hæð y. sjó: 10 m við upphaf, 517 m hæst, 10 m við lok
Samanlögð hækkun: 580 m
Vegalengd: 16,99 km
Tími: 2:46:37 klst.
Meðalhraði: 6,12 km/klst (9:48 mín/km)
Dags.: 17. júlí 2026 kl. 10:57
Hlaupafélagar: 
Birkir Þór Stefánsson
Sara Kristjánsdóttir
Una Þorkelsdóttir (í hjólavagni)
Þorkell Stefánsson (á hjóli)

Fróðleikur um leiðina:

Vegurinn yfir Hrafnseyrarheiði var til skamms tíma hluti af aðalveginum milli norður- og suðurhluta Vestfjarða, þ.e. allt frá því að akfær vegur var fyrst lagður yfir heiðina um 1950 og þar til Dýrafjarðargöng voru opnuð fyrir umferð í október 2020. Hlaupaleiðin yfir Hrafnseyrarheiði er því auðrötuð og undirlagið víðast þokkalega slétt. Sem bílvegur var leiðin hins vegar oft mikill farartálmi, iðulega ófær á vetrum og hættuleg í hálku þar sem leiðin liggur í bröttum sneiðingum. Það þótti því við hæfi að síðasti snjómokarinn á heiðinni æki fyrstur manna í gegnum göngin þegar þau voru opnuð.

Hlaupið yfir Hrafnseyrarheiði hefst á vegamótum rétt utan við Hrafnseyri. Fyrsta spölinn er hlaupið inn Hrafnseyrardal utan við Hrafnseyrará. Eftir u.þ.b. 2,6 km er hlaupið yfir Geldingadalsá og eftir það er mál til komið að yfirgefa grösugan dalinn og leggja í brekkurnar. Vegurinn upp á heiðina liggur í bröttum sneiðingum. Rétt áður en komið er upp á háheiðina sveigir leiðin fyrir svonefnt Horn og þar sést ofan í Manntapagil á hægri hönd. Nafnið skýrir sig sjálft, enda var þessi leið hættuleg á vetrum bæði fyrr á árum og í seinni tíð. Á þessum slóðum er talsverð snjóflóðahætta og síðast varð mannskaði þarna þegar tveir menn fórust í snjóflóði 22. mars 1971. Upp á háheiðina eru um 7,4 km frá upphafsstaðnum og þaðan liggur slóði til austurs inn á Glámuhálendið. En leiðin liggur ekki þangað í þetta sinn.

Leiðin norður og niður af heiðinni liggur um Brekkudal og er nokkuð brött, þótt vegstæðið sé ekki eins stórskorið og að sunnanverðu. Fyrsta spölinn er hlaupið niður með Þverá, með ána á hægri hönd en Grandahorn (646 m) til vinstri. Eftir u.þ.b. 12,4 km liggur leiðin yfir ána og eftir það opnast Galtardalur inn til vinstri. Þarna við Þverá hófst vegagerð yfir Hrafnseyrarheiði árið 1946 með handverkfærum og hestakerrum. Árið eftir var haldið áfram með verkið með jarðýtu og um 1950 var leiðin orðin bílfær.

Eftir u.þ.b. 14 km er hlaupið framhjá bænum Brekku í Brekkudal og þar sést yfir að bænum Bakka hinum megin (vestan) við Brekkudalsá. Frá Brekku er líka gott útsýni út Dýrafjörð.

Eftir u.þ.b. 15 km fer leiðin hækkandi á nýjan leik. Þar er hlaupið upp á Brekkuháls sem nær mest um 75 m hæð. Af hálsinum liggur akfær vegarslóði upp á Sandafell (361 m). Þar uppi er víðsýnt og þar hefur verið komið fyrir útsýnisskífu sem gefur umhverfinu nöfn og glæðir það tilgangi. Af hálsinum er örstutt niður á aðalveginn innst í Þingeyrarþorpinu. Þar endar hlaupið.

Ferðasagan:  

Ferðasöguna má að miklu leyti lesa úr þar til gerðu myndaalbúmi á Facebooksíðu Fjallvegahlaupaverkefnisins.

Lokaorð:

Hrafnseyrarheiði hentar einkar vel til fjallvegahlaupa að sumri til, þó að hún sé hættuleg á veturna. Veginum yfir heiðina er vel við haldið og undirlagið því eins auðvelt og best gerist. Og þegar veðrið er gott er útsýnið það líka.

Helstu heimildir: