Fjallvegahlaupadagskrá sumarsins 2026 er smám saman að skýrast. Á sumri komanda ætla ég að hlaupa níu leiðir og þar með verður heildartalan komin upp í 100. Þá er mál að linni. Sumarið 2026 verður sem sagt ekki bara tuttugasta heldur líka síðasta sumar fjallvegahlaupaverkefnisins.

Fjallvegahlaup sumarsins hefjast laugardaginn 9. maí og lýkur laugardaginn 8. ágúst. Dagsetningar þar á milli eru enn í vinnslu. En í grófum dráttum mun þetta líta svona út:

1. Laugard. 9. maí: Lyngdalsheiði frá Gjábakka í Þingvallasveit til Laugarvatns (16 km). Hlaupið verður skipulagt í samvinnu við Bókaútgáfuna Sölku (rétt eins og Hellisheiðin í fyrra). Fylgt verður gamla veginum yfir heiðina, þ.e.a.s. nokkurn veginn sömu leið og hlaupin er í hinu árlega Bláskógaskokki.
2. Snemma í júní: Ketuvegur (yfir Skagaheiði) frá Steinnýjarstöðum utan við Skagaströnd að Ketu á Skaga (um 23 km).
3. Líka snemma í júní: Ólafsfjarðarskarð frá Þverá í Ólafsfirði að Ketilási í Fljótum (um 16 km).
4. Seint í júní: Fagranesskarð, þvert yfir Langanesið frá Hlíð í Þistilfirði að Fagranesi við Bakkaflóa (um 11 km).
5. 12.-19. júlí: Fjallvegur á norðanverðum Vestfjörðum, t.d. Heiðarskarð úr miðbæ Bolungarvíkur yfir í miðbæ Ísafjarðar (um 18 km), Breiðadalsheiði (bílvegurinn) frá Skutulsfirði til Önundarfjarðar (um 12 km) og Álftafjarðarheiði frá Seljalandi í Álftafirði að Kirkjubóli í Korpudal í Önundarfirði (um 20 km). Fleiri leiðir koma til greina í stað einhverra þessara þriggja, sjá Vestfjarðakaflann á hugmyndasíðunni. Og allar ábendingar eru vel þegnar.
6. 12.-19. júlí: Annar fjallvegur á norðanverðum Vestfjörðum (sjá nr. 5).
7. 12.-19. júlí: Enn einn fjallvegur á norðanverðum Vestfjörðum (sjá nr. 5).
8. Seint í júlí: Óákveðið, en mögulega eitthvað auðvelt og aðgengilegt eins og t.d. Sölvamannagötur eða Húksleið, sem báðar byrja eða enda í Hrútafirði.
9. Laugard. 8. ágúst: Heljardalsheiði frá Sleitustöðum í Skagafirði að Atlastöðum í Svarfaðardal (um 31 km).

Allt er þetta birt með alls konar fyrirvörum um dagsetningar og leiðir.

Eins og áður er öllum velkomið að hlaupa þessa fjallvegi með mér – á eigin ábyrgð. Eins og fram hefur komið verður þetta síðasta fjallvegahlaupasumarið, þannig að nú fer hver að verða síðastur að njóta.

(Síðast uppfært 3. febrúar 2026)