Háaheiði

Staðsetning: Frá Glúmsstöðum í Fljótavík að Hesteyri
Áfangar og hnattstaða: 
Upphaf:               0,00 km ( 37 m), N66°24,65' - V22°52,39'
Glúmsstaðadalur:      0,58 km (134 m), N66°24,36' - V22°52,51'
Háaheiði norður:      3,37 km (521 m), N66°23,06' - V22°52,40'
Háaheiði suður:       4,11 km (495 m), N66°22,71' - V22°52,41'
Lok:                  9,80 km (  5 m), N66°20,17' – V22°52,58'
Hæð y. sjó: 37 m við upphaf, 521 m hæst, 5 m við lok
Samanlögð hækkun: 555 m  
Vegalengd: 9,80 km
Tími: 2:32:31 klst.
Meðalhraði: 3,86 km/klst (15:34 mín/km)
Dags.: Þriðjudag 4. júlí 2023, kl. 15:43
Hlaupafélagar: 
Arnór Freyr Ingunnarson
Birgitta Stefánsdóttir
Birkir Þór Stefánsson
Gunnur Róbertsdóttir
Ingólfur Helgi Ingólfsson
Ingveldur H. Ingibergsdóttir
Jón Ragnar Ragnarsson
Sara Kristjánsdóttir
Sigríður Drífa Þórólfsdóttir
Sóley Birna Hjördísardóttir
Tómas Orri Ragnarsson

Fróðleikur um leiðina:

Leiðin yfir Háuheiði er bæði sögð vera „dáskemmtileg“ og „góð og falleg“ (GÁG, bls. 95), en reyndar líka grýtt og þokusæl. Hlaupið hefst við Glúmsstaði í Fljótavík. Þar þótti harðbýlt, mjög snjóþungt á vetrum og tók seint upp. Beitiland var gott á sumrin og mikill silungur í ám og vötnum, en öðrum hlunndinum varla til að dreifa. En landið er „íðilfagurt“ ef marka má Árbók Ferðafélagsins frá 1994. Síðast var búið á Glúmsstöðum um 1920.

Fyrsti spölurinn upp frá Glúmsstöðum er vel gróinn og ekki brattur. Þar er í sjálfu sér hægt að fara hvar sem er, en heppilegast er að stefna skáhallt til vinstri upp hjallann fyrir ofan bæinn. Fossá fellur í Glúmsstaðafossi fram af hjallanum talsvert innar og þar er hjallinn brattari. Minni lækir renna niður hjallann nær hlaupaleiðinni. Þegar komið er upp á hjallann er sömu stefnu haldið nánast beint í suður inn Glúmsdal og ánni fylgt að mestu (með ána á vinstri hönd) eftir að komið er vel upp fyrir fossinn. Reyndar liggur öll leiðin frá Glúmsstöðum að Hesteyri nánast beint í suður.

Leiðin úr botni Glúmsstaðadals og upp á heiðina er býsna brött og þar tekur mun grýttara landslag við af grösugum brekkum. Heiðin sjálf er grýtt og flöt þegar upp er komið, en þar kvað vera gott útsýni yfir Aðalvík þegar skyggni er gott. Nokkrar vörður eru þarna í brúninni og uppi á heiðinni, bæði þéttar og stæðilegar, en hvorki vörður né greinileg gata eftir það. Af þessum sökum er leiðin suður af ekki auðrötuð í dimmviðri, en í góðu skyggni sést Kagrafell sem kennileiti framundan og lítið eitt til hægri. Enn er stefnt í suður um Dagmálaskarð og niður með Kagrafelli að austanverðu (vinstra megin við fjallið). Þar er tekið að halla vel undan fæti áleiðis niður Lönguhlíðardal að Hesteyri þar sem hlaupið endar.

Ferðasagan:  

Ferðasöguna má að mestu leyti lesa úr þar til gerðu myndasafni á Facebooksíðu Fjallvegahlaupaverkefnisins.

Lokaorð:

Leiðin yfir Háuheiði kann að vera bæði „dáskemmtileg“ og „góð og falleg“, en upplifun fólks af fjallvegum getur verið talsvert háð veðri og sama gildir um umsagnir fólks um hlaupnar slóðir. Í öllu falli getur verið kalsamt á Háuheiði þegar norðanáttin nær sér á strik og úrkoma er langt yfir meðallagi. 

Helstu heimildir:

  • Guðrún Ása Grímsdóttir (1994): Ystu strandir norðan Djúps. Um Kaldalón, Snæfjallaströnd, Jökulfirði og Strandir. Árbók Ferðafélags Íslands 1994. Ferðafélag Íslands, Reykjavík.
  • Gunnar Þórðarson (á.á): Gönguleiðin frá Glúmsstöðum að Bæjarnesi. Fljótavík.is. https://www.fljotavik.is/gongulysingar/gth-glumstadir-ad-baejarnesi.
  • Helgi M. Arngrímsson o.fl. (2009): Vestfirðir og Dalir 1. Hornstrandir/Jökulfirðir. Gönguleiðakort. Ferðamálasamtök Vestfjarða.
  • Hornstrandir.is (á.á): Átthagafélag Sléttuhrepps. http://www.hornstrandir.is/atthagafelag_slettuhrepps.