Eyrarfjall

Staðsetning: Úr botni Mjóafjarðar að Eyri í Ísafirði
Áfangar og hnattstaða: 
Upphaf:                 0,00 km (  7 m), N65°49,19' - V22°39,61'
Við Álftaborg:          6,67 km (356 m), N65°48,17' - V22°36,02'
Lok:                   11,28 km ( 38 m), N65°48,07' - V22°32,33x'
Hæð y. sjó: 7 m við upphaf, 356 m hæst, 38 m við lok
Samanlögð hækkun: 352 m
Vegalengd: 11,28 km 
Tími: 1:25:55 klst. 
Meðalhraði: 7,88 km/klst (7:37 mín/km)
Dags.: Mánudagur 15. ágúst 2023, kl. 14:59 
Hlaupafélagar: 
Birkir Þór Stefánsson

Fróðleikur um leiðina (í vinnslu):

Eyrarfjall

Hæst fer vegurinn í 356 m.y.s. við Álftaborg (387 m).

Vegurinn yfir Eyrarfjall missti hið upprunalega hlutverk sitt árið 2009 þegar brú yfir utanverðan Mjóafjörð var tekin í notkun. Síðan þá hefur veginum yfir fjallið lítið verið haldið við. Hann er þó enn fær vel búnum jeppum, þrátt fyrir að ræsi séu farin að láta á sjá og hlíðin upp úr Mjóafirði orðin sundurskorin eftir óheft vatnsrennsli í vorleysingum.

Ferðasagan:

Ferðin yfir Eyrarfjall var ákveðin með stuttum fyrirvara í miðri viku, að einhverju leyti með hliðsjón af veðurspá. Veðrið lék enda við okkur á leiðinni og engin vandamál komu upp. Við Birkir vorum tveir á ferð sem oftar, en fyrr um daginn höfðum við hlaupið yfir Skötufjarðarheiði og endað í hádegismat í Heydal í Mjóafirði. Hlaupið yfir Eyrarfjall var því síðara fjallvegahlaup dagsins.

Leiðin yfir Eyrarfjall byrjar ekki í Heydal, heldur inni í Mjóafjarðarbotni. Ferðalagið byrjaði því með 6,6 km skokki eftir veginum inn með Mjóafirði, framhjá Djúpmannabúð þar sem ég staldraði stundum við á ferðum mínum milli Hólmavíkur og Ísafjarðar seint á síðustu öld, löngu áður en brú kom yfir Mjóafjörð miklu utar. Síðan þá hefur Djúpmannabúð ekki verið í alfaraleið og leiðin yfir Eyrarfjall ekki heldur hluti af bílveginum til Ísafjarðar.

Hið eiginlega fjallvegahlaup yfir Eyrarfjall hófst á vegamótunum skammt frá fjárhúsunum í Botni í Mjóafirði. Hlaupið sjálft var tíðindalítið eins og títt er með fjallvegahlaup sem fylgja aflögðum bílvegum, sérstaklega bílvegum sem maður hefur sjálfur ekið margoft. Ferðasagan felst því að mestu eða öllu leyti í myndunum sem voru teknar á leiðinni.

Nýlagðir af stað, 1,4 km og 10 mín að baki. Fjárhúsin í Botni í baksýn og bærinn lengra til vinstri.
Vegurinn í hlíðinni er farinn að láta á sjá.
Þetta er með naumindum fært á góðum jeppum en greiðfært fyrir Birki.

Birkir í fyrstu stóru beygjunni í sneiðingunum upp hlíðina. 2 km og 17 mín að baki og hæðarmælirinn kominn rétt yfir 100 m. Í baksýn sést inn Bessárdal sem gengur inn úr Mjóafirði.

Ræsunum í veginum hefur ekki verið haldið vel við frá því að vegurinn hætti að vera aðalvegur. Sums staðar er jafnvel orðið erfitt fyrir vatnið að komast í gegn. Þarna vorum við komnir langleiðina upp á fjallið, um 6 km og 56 mín að baki og hæðarmælirinn að nálgast 350 m.
Farið að halla austuraf. 7,4 km og 1:06 klst. að baki. Í fjarska sést líklega út að Nauteyri handan Ísafjarðar.
Á sprettinum niður lúpínubrekkurnar Ísafjarðarmegin. Hinum megin við fjörðinn sést húsið í Gervidal og mynni Gervidals þar innan við. Þar er einmitt hægt að hlaupa upp á Skálmardalsheiði, rétt eins og gert var í fjallvegahlaupi nr. 40 16. ágúst 2014.
Á leiðarenda við Eyri í Ísafirði, 11,28 km og 1:25:55 klst. að baki (meðalhraði 7:37 mín/km). Ekki flókið að hlaupa svona fjallvegi.

Lokaorð:

Eyrarfjall verður að teljast frekar auðveld fjallvegahlaupaleið. Þetta eru í fyrsta lagi ekki nema rúmir 11 km, í öðru lagi fer hæðin ekki nema í u.þ.b. 350 m og í þriðja lagi var þetta frekar fjölfarinn bílvegur allt til haustsins 2009 þegar brúin yfir Mjóafjörð var tekin í notkun. Á aflögðum bílvegum verða að jafnaði færri óvæntir atburðir en á fjölbreyttari fjallvegum með tilheyrandi villuhættu og vatnsföllum.

Helstu heimildir:

  • Ólína Kjerúlf Þorvarðardóttir (2017): Við Djúpið blátt. Ísafjarðardjúp. Árbók Ferðafélags Íslands, 2017.